ሆላንድ ካር ኩባንያ ስራ አቆመ

አዲስ አበባ ፣ ህዳር 12 ፣ 2005 (ኤፍ ቢ ሲ) ሆላንድ ካር ሀላፊነቱ የተወሰነ የግል ኩባንያ በደረሰበት ኪሳራ ምክንያት ስራ ማቆሙን አስታወቀ።

ኩባንያው የገጠመውን የገንዘብ ቀውስ ለመፍታት ፥ ላለፉት አምስት ወራቶች ያደረገው ጥረት አለመሳካቱን ዋና ስራ አስኪያጁ ኢንጂነር ታደሰ ተሰማ ተናገግረዋል።

ኩባንያው በሃገሪቱ የሚታየውን የትራንስፖርት እጥረት በመቅረፉ የበኩሉን ሚና ለመጫወት ፥ መኪና ለማምረት ከሚመለከታቸው ባለድርሻ አካላት ጋር በጋራ ሲሰራ ቢቆይም ፥ ያለፉትን 2 አመታት በኪሳራ ምክንያት ያለስራ በማሳለፉ መዘጋቱንም ነው የጠቀሱት።

ተቋሙ በኢትዮጵያ የንግድ ህግ መሰረት በኪሳራ እንዲዘጋ ለፍርድ ቤት በማመልከቻ የጠየቀ ሲሆን ፥ በአመት እስከ 18 ሚሊየን ብር የሚደርስ ኪሳራ ማስመዘገቡ ነው በመግለጫው ላይ የተመለከተው።

የኩባንያው ሰራተኞችን በተመለከተም የሚሰናበቱ ሰራተኞች ድርጅቱ ሙሉ ጥቅማቸውን አስከብሮ እንደሚያሰናብት ስራ አስኪያጁ አስረድተዋል።

በአሁኑ ወቅት ገንዘብ የከፈሉ 120 ያክል ደንበኞች መኪኖቻቸውን እንዲያገኙ ጥረቶች እየተደረጉ ነው ያሉት ኢንጂነር ታደሰ ፥ ጉዳዩ እንደተሳካ እናሳውቃለን ብለዋል።

www.fanabroadcasting.com